ازاي خريج صيدلة مصري يشتغل صيدلي في أمريكا؟

من الأسئلة المتكررة هو ازاي خريج صيدلة مصري يشتغل صيدلي في أمريكا ؟
الإجابة النهائية هو حاليا مفيش فرص و الطريق مقفول إن صيدلي ييجي من مصر أو غيرها عشان ياخد رخصة صيدلي و يشتغل في أمريكا إلا في حالات استثنائية…
الأول هشرح الطريق بالكامل و أقول فين العقبة و إيه هي الناس الي ممكن تتخطاها…
أول خطوة هي عمل المعادلة و الحصول علي
Foreign Pharmacy Graduate Examination Committee (FPGEC) Certification
المعلومات و التفاصيل موجودة علي الموقع ده

المطلوب باختصار هو انت تجهز شهادة مؤقتة انجليزي مع تفاصيل الكورسات و الدرجات من الكلية و تصريح مزاولة المهنة من وزارة الصحة و قيد نقابة الصيادلة من النقابة … الورق بيتبعت للهيئة الي في الموقع السابق و بتراجع ورقك و تسمح لك تمتحن امتحان المعادلة…
في مرحلة المعادلة مطلوب منك امتحان المعادلة و التويفل و الاثنين لازم تمتحنهم في أمريكا و بتقدم علي فيزا سياحة عشان تروح تمتحن… تكلفة الامتحانات و الفيزا و السفر هتعدي التلات دولار ده لو نجحت من أول مرة…
ورق سليم و نجحت في الامتحانين كده انت كملت المعادلة … بس مش معناه إنك ليك الحق في ممارسة الصيدلة في امريكا ..
بعد المعادلة بتيجي الخطوة الأصعب و هي العقبة الي قافلة الطريق حاليا.. الخطوة دي هو الحصول علي التدريب المطلوب و هو 1500 ساعة في الولاية الي انت عاوز تشتغل فيها صيدلي في امريكا … المشكلة انك عشان تاخد التدريب لازم اذن من ادارة الصيدلة في الولاية الامريكية و عشان تاخد الاذن Intern permit لازم يكون معاك بطاقة ضمان اجتماعي SSN و عشان تاخد بطاقة الضمان الاجتماعي لازم تكون معاك فيزا تسمح لك بالشغل في أمريكا بشكل قانوني … يعني مينفعش تكسر فيزا سياحة مش هتعرف تاخد اذن التدريب …
المشكلة التانية هي انك محتاج مكان تتدرب فيه و ده بقي صعب جدا… زمان كان في عجز في الصيادلة فكانت الصيدليات أو المستشفيات بتقدم علي فيزا شغل للصيادلة الأجانب عشان يتدربوا… دلوقتي معدش في عجز فميش دافع يجيبوا أجانب و يتحملوا تكلفة الفيزا و التدريب…
تالت مشكلة إن مع زيادة كليات الصيدلة بقي في ضغط كبير علي أماكن التدريب في كليات صيدلة جديدة مهددة بالإغلاق بسبب نقص أماكن التدريب و ده مبخليش في مكان لأجنبي حتي لو مش هياخد فلوس…
مين الي ممكن يتغلب علي العقبات دي؟
من اللي انا شوفته إن الناس الي معاها جرين كارد و بالتالي بطاقة ضمان اجتماعي بيقدروا ياخدوا تدريبهم إذا لقوا شغل كفني (مساعد صيدلي) … الصيدلي الأجنبي بعد ما يخلص المعادلة بياخد اذن التدريب و يدور علي شغل في صيدلية كمساعد و إذا لقي الصيدلي المشرف ممكن يعتمد له الساعات و تقبلها ادارة الصيدلي… الموضوع مش سهل و لي أصدقاء قعدوا سنين علي مع عرفوا يلاقوا مكان يخلصوا التدريب… و ده مش متاح لحد علي فيزا الكلام ده للي معاه جرين كارد أو جنسية…
الطريقة التانية الناس الي بتدرس دكتوراه أو ماجسيتير و معاها تصريح الشغل الي بتاخدوا من الجامعة و بيسمح لهم بالشغل داخل الجامعة… الناس دي ممكن تشتغل أو تتطوع في صيدلية مستشفي الجامعة و تخلص الساعات… الكلام ده للي في أمريكا علي فيزا دراسة أو شغل في جامعة و معاهم بطاقة ضمان اجتماعي …
بعد ما تكمل ساعات التدريب المطلوبة في امتحان الرخصة (النابلكس) و امتحان القانون الخاص بالولاية الي انت فيها … نجحت في الاثنين بقيت صيدلي مرخص قد الدنيا…

تفاصيل الورق المطلوب تقدر تراجعها من علي الموقع و برده تفاصيل الامتحان… القاعدة العامة لو انت عندك مشكلة في قراية الموقع و فهم المطلوب يبقي مش هتعدي التويفل أصلا …

المصدر

Please follow and like us: